Vanzelfsjpraekend is oze grootste aktiviteit:… de ‘Grote Optoch’. Dit ervare väöl luuj (en veer dus ouch) ès ein hoogtepuntj van de Zittesje Vastelaovend. Ein leuk thema bedenke, väöl sjaele kal en dich ammeseiere mit de luuj langs de kantj van de waeg, in ein woord ‘geweldig’!
Gedurende ‘t Vastelaovesssezoen zeen veer natuurlik dèks van de pertie. De versjillende zittinge, mit ès veurkeur de Vrouluujzitting, de Oetruipingszitting mit den daag d’rnao ‘t Aope Hoes van de nuuje Prins en gank zo mer wiejer..
In al die jaore zeen d’r ummer mee aktiviteite biegekómme. Zo höbbe veer ès richtige damesvereiniging de “WC-activiteit” in ‘t laeve geroupe óm ouch ‘t Vastelaovesgevuil oppe WC vas te kènne hawte. Daonaeve zitte veer saer 3 jaor in de organisatie van de “Äöpening Sezoen”, dat jeder jaor oppe zóndig nao d’n elfde van d’n elfde plaatsjvèndj. Veural ‘t Kènjerpregram numme veer veur oze raekening. Veer zeen dan ouch ummer te vènje in de buurt van dae Kènjerhouk. Saer aafgeloupe jaor dènke veer ouch aktief mit euver de organisatie van de Kènjerzitting! Welk thema wurt gekaoze, welke artiste kómme oppe buhn? etc.
En v’r blieve zeker oetbreije.. Zo zit d’r saer korte tied ein Vlemke in de Jeugcommisse van de Marotte.
Boete ‘t Vastelaovessezoen óm doon veer ouch mit aan versjillende aktiviteite. De Zittesje Zeipkisterace is hie ein gout veurbeeld van. ‘T eesjte jaor moosj ‘t publiek nog oetkieke, mer al zègke v’r ‘t zelf… oefening baart kuns!! Gaer zouwe veer ouch mitsjeite bie ‘t Alternatief Sjöttefees. Ós bedoeling is om hie ein ‘moder-dochter’ aktiviteit van te maken. Jaomer genóg sjtaon v’r noe al ein paar jaor allein nog oppe wachlies!
Naeve al dees sjoon aktiviteite veur èn van de Zittisje Vastelaovend, motte veer waal ouch een bietje veur ószelf zörge.. V’r sjpichte ós dan ouch jeder jaor weier op ’t Vlemkes-weekend dat wurt gepland..! Jeder jaor organiseiere 2 Vlemkes ein verrassings-oetsjtepke veur de ganse vereiniging.. Wie lestig ’t ouch is, de locatie en biegehorende aktiviteite blieve geheim! Pès noe is ’t gelökkig nog nooit taegegevalle..!