Veer, de saer fibberwarie 2007 opgerichte vrouluuj vastelaovesvereiniging “De Vlemkes”, organiseiere aankómmende Vastelaovend veur de veierde keer de ‘Sjoonst geseierde WC-ke wedsjtried’ veur alle kafeekes in Zitterd. Wit geer nog woróm? Dat zulle veer uch nog èns vertèlle.
Van alle vastelaovesvierders is bekans 50% ein maedje. Die maedjes hauwte aeve gout wie alle mansluuj van ein lekker glaeske drènke mit de vastelaovesdaag. Jaomer genòg beteikent dat veur bienao alle vrouluuj dat ze heel dèks nao de WC motte; gemiddeld eine keer per oer. Oetgaonde van vief vastelaovesdaag, die ongeveer teen oer per daag doere, gaon dees dames dus vieftig keer nao de WC. Geer wit alleney dat de riej bie de vrouluuj WC ummer ein lange is en ’t doert dan ouch gemèkkelik zeven minute, veurdat veer op ’t pötje kènne plaatsjnumme. Dao nao höbbe veer zeker drie minute neudig óm de hendjes te wèsje en ’t maske te poejere.
Höb geer mitgeraekend? Veer zitte in totaal 5 x 10 x 10 = 500 minute per Vastelaovend op de WC! Ómgeraekend zeen dat ruum ach oere. Wat veer hie mit wille zègge is dat ouch op de WC de vastelaovessfeer aanwezig mòt zeen, angesj höbbe veer eine daag van de Vastelaovend gemis.
Veer daage de kafeekes dan ouch oet óm uch veur alle vrouluuj van Zitterd en omliggende plaatsje in te zètte óm ouch de WC in ein vastelaovessfeer te seiere. Zodat, veer vrouluuj, kòmmende jaore nog ein baetere Vastelaovend kènne viere es aafgeloupe jaore.
Veer Vlemkes zulle mit de vastelaovesdaag zelf de prouf op de som numme door alle WC-kes van de Zittesje kafees te beoordeile. Mèr, veer doon dit niet allein. Ouch dit jaor zulle de Vlemkes weier óngersjteund waere door ein vakjury. Daonaeve kriege alle Zittesje mechelkes via dees website de kans óm op hun favoriete WC te sjtömme.
‘t Winnende kafee zal op vastelaoveszaoterdig bekénd gemaak waere oppe mert mit ’t kanon van ‘t balkon.
Winnaars aafgeloupe jaore:
2010: Cafe Bloem
2009: Cafe de Buren
2008: Cafe Ich en Dich