Leif luuj,
Wat leuk dat geer de website van de Vlemkes aan ’t bekieke zeet. Geer zeet zeker erg benuujd wae de Vlemkes noe èch zeen en wo veer òs zoal mit bezig hawte in ’t dagelijks laeve.
Ich bèn Natalie Statnik, gebaore op 12 oktober 1984 in Zitterd. Dat maak mich op dit moment dus 26 jaor oud (eigenlijk jongk hè?). Niet allein gebaore mer ouch groot gebrach in dees sjoon sjtad.
Noe bèn ich advocate bij KampsVanBaar Advocaten, in Zitterd natuurlijk! Dus es geer hulp neudig höb, wit geer mich tenminste sjnel te vènje…
In miene vrieje tied ken ich geneite van versjillende dènger, sjporte, film kieke, oetsjtepkes maake, winkele.. Mer ’t plezeier maake mit mien vrunj vènj ich toch de leukste bezigheid.. Dèks gaon die leuke dènger ouch nog zelfs saame.. Plezeier maake mit mien vrunj höb ich altied al gedaon.. Al op de St.Petrussjool, wo collega-Vlemke Joyce Timmers bie mich in de klas zout, maakde veer saame sjpas en lol.. En wie ich later op de middelbare sjool (’t Kleesj!) Joyce Gijsen leerde kènne, is dae sjpas en lol natuurlijk allein mer 
toegenomme..
Ich woon oppe Sjteivig in Zitterd en saame mit mich woont dao ouch miene vrundj, Fabio.. Ich höb natuurlijk niet lang houve kalle veurdat ich ‘m haw euvergehaold om nao ’t sjoone Zitterd te verhoeze.. Fabio kump namelijk oet Apeldoorn, ouch leuk, mer die sjtad haolt ’t neit bie Zitterd.. Dat sjprik veur zich! Gelökkig haet ouch hae Zitterd noe in zien hart gesjlaote.. En mit dat Vastelaovend viere, zit ’t zeker ouch waal goud!
’T is neit gemekkelik om get euver mich zelf te vertelle.. Waat ich van anger luuj heur, is dat ich in jeder geval ein sjpontaan en gezellig maedje bèn, ein betroebare vriendin mit wae vööl gelache kent waere.. En jao, aaf en toe höb ich ouch waal èns de kolder in de kop.. Zeker mit de vastelaovesdaag natuurlijk! “Geneite van ’t laeve”, dat is ’t belangriekste..
Van jongs aaf aan zit de Vastelaovend in mien bloud en zodra dat prachtige sezoen weier wurt geäöpend, begint datzelfde bloud sjneller te sjtruime. Ich bèn noe bekans drie jaor lid van dees sjoon vereiniging en dat maak de Vastelaovend allein nog mer leuker! De gezelligheid en ’t saame sjpas maake sjteit dan veurop!
Op de klanke van ‘Doe bès mien maedje’ en ‘Zitterd allein’ wurt ‘r ummer flink gesjunkeld. En of ich noe de Grote Optoch loup, bie ’t Tröötekonkour bèn, of ‘appelesiene!’ vang, al daag höb ich sjpas en lol!
Doot geer mit mich mit..?
Natalie Statnik